Samfélagssáttmáli

Menntastefna Akureyrarbæjar er samfélagssáttmáli um skóla- og frístundastarf, áherslur og starfshætti. Hún lýsir hvernig skólar þróa starf sitt í takt við hraðar samfélagsbreytingar og tryggir sameiginlegan ramma um verklag og ákvarðanir sem hafa mótandi áhrif á velferð, árangur og framfarir barna. 

Starfshættir og áherslur í menntun hafa nú verið til endurskoðunar í ljósi þess að skólastarf byggir í auknum mæli á nýtingu þekkingar, gervigreindar og annarrar tækni, samvinnu, sköpun og lausnamiðaðri og gagnrýnni hugsun. Í kjölfarið beinist skólastarf með skýrari hætti að lykilhæfni barna, félags- og samskiptafærni og sjálfsvitund.

Skólar og fjölskyldur taka höndum saman um velferð og framfarir barna. Skólar Akureyrarbæjar eru framsæknir, mæta þörfum barna og leggja megináherslu á gæði í skipulagi og framkvæmd starfs. 

Menntastefnan undirstrikar að ákvarðanir skuli teknar út frá þörfum barna og að starfshættir taki mið af þroska þeirra, áhuga og styrkleikum. Í samvinnu við fjölskyldur styðja skólar Akureyrarbæjar börn til að takast á við viðfangsefni sín með bjartsýni og þrautseigju að leiðarljósi, þannig að hvert barn taki framförum skref fyrir skref.