Menntastefna Akureyrarbæjar
2026-2031„Allir sem koma að menntun og uppeldi deila þeirri trú á að öll börn geti lært og tekið framförum.
Menntastefna Akureyrarbæjar frá árinu 2020 hefur nú verið endurskoðuð og ný stefna tekur gildi. Hún tekur mið af fjölmörgum þáttum og endurspeglar þær áherslur sem samfélagið kallaði eftir við mótun hennar. Opinber stefnumótun vegur einnig þungt, þar sem ný menntastefna Íslands til ársins 2030 er komin til framkvæmda. Breytingar á aðalnámskrá og gæðaviðmiðum um skólastarf hafa sömuleiðis áhrif á stefnuna og aðgerðaáætlun sem henni fylgir. Lög um farsæld barna eiga fastari sess í stefnunni og aðgerðir næstu ára styðja við þá vinnu enn frekar.
Jafnframt er mikilvægt að horfa til þeirra miklu breytinga í stafrænu umhverfi og annarrar samfélagsþróunar. Menntun þarf að mæta nýjum áskorunum og tækifærum, og stefna í vinnu með gervigreind þarf að vera í sífelldri endurskoðun og í takt við þá þróun sem á sér stað. Breytingar á frístundamálum barna og unglinga, sem sveitarfélagið er að þróa, eru liður í að bæta aðgengi barna og ungmenna að sérfræðingum og stuðningi í nærumhverfi þeirra. Formleg og óformleg menntun á samanlagt að skapa hverju barni tækifæri til að byggja upp sterka sjálfsmynd og vera gott veganesti til náms og þátttöku í samfélaginu til framtíðar. Með góðu samstarfi þar sem þekking og reynsla ólíkra fagstétta fær jafnt vægi, er unnt að bregðast hratt við þeim áskorunum sem börn og unglingar mæta í námi og lífi.
Í skólum sveitarfélagsins starfar fólk með mikla reynslu og þekkingu sem þarf að hafa tækifæri til stöðugrar starfsþróunar. Innleiðing nýrra starfshátta byggir á styrkri forystu og fagmennsku. Ytra mat sem fram fór við endurskoðun stefnunnar sýnir að þrátt fyrir áskoranir á tímum Covid-19 hélt starfsfólk skóla áfram að þróa kennsluhætti og innleiða leiðsagnarnám í öllum grunnskólum. Þar má í auknum mæli sjá merki um hæfnimiðað nám. Heildstæðar áætlanir eru að verða til og vinna við námsmat er vel á veg komin. Í leikskólum er unnið markvisst með læsi og málörvun, andrúmsloftið er hlýlegt og styðjandi og frjáls leikur er burðarás í starfi skólanna. Gæðaviðmið um skólastarf hafa verið nýtt vel og gæðaráð eru starfandi í hverjum skóla, þar sem innra mat hefur verið þróað og unnið mikilvægt starf í þágu barnanna.
Ábyrgð og innleiðing
Akureyrarbær styður markvisst við innleiðingu menntastefnunnar og tryggir að hún endurspeglist í stefnum skólanna. Fræðslu- og lýðheilsuráð, í umboði bæjarstjórnar, ber ábyrgð á mati og eftirliti með framgangi stefnunnar. Skólastjórar í samvinnu við aðra stjórnendur bera meginábyrgð á stefnan verði hluti af daglegu starfi og innleidd markvisst á gildistímanum 2026-2031. Stjórnendur og starfsfólk skóla gegna lykilhlutverki í framkvæmd stefnunnar og er stuðningur sveitarfélagsins við þau forsenda árangursríkrar innleiðingar.
