Við framkvæmd og innleiðingu menntastefnu Akureyrarbæjar liggja þrír þættir til grundvallar:
Fyrirmyndarstarfshættir
Leikur, nám og kennsla
Stjórnun og fagleg forysta
Fyrirmyndarstarfshættir
Skóla- og frístundastarf er framsækið, mætir þörfum barna og leggur megináherslu á gæði í skipulagi leiks, náms og kennslu. Starfshættir byggja á sameiginlegri sýn og gæðaviðmiðum sem styðja áreiðanlega framkvæmd og stöðugar umbætur. Umbótavinna tekur mið af stöðu, velferð og framförum barna og byggir á markvissri notkun fjölbreyttra gagna.
Innra og ytra mat er framkvæmt reglulega í öllum skólum og niðurstöðum fylgt eftir með umbótum. Mat á starfsháttum, velferð og framförum er óaðskiljanlegur hluti af daglegu starfi og forsenda þess að skólastarf teljist til fyrirmyndar. Akureyrarbær leggur ríka áherslu á að í skólum starfi hæft og öflugt fólk og að eftirsóknarvert sé að starfa þar.
Leikur, nám og kennsla
Leikur, nám og kennsla eru þungamiðja skólastarfs. Á öllum skólastigum er unnið samkvæmt viðmiðum um gæðastarf þar sem leiðsagnarnám og markvisst, áreiðanlegt námsmat styður framfarir og árangur hvers barns.
Læsi, samþætting námsgreina og sköpun eru í fyrirrúmi. Lykilhæfni barna er grunnur að sjálfstæði þeirra og mikilvægur þáttur í daglegu lífi. Allir sem starfa með börnum og unglingum sýna í verki óbilandi trú á að öll geti þau tekið framförum og stuðlað að eigin velferð. Aukið val í námi styrkir námsvitund og gerir börnum og unglingum kleift að rækta áhuga og styrkleika. Óformlegt nám í frítíma er einnig mikilvægt; þar skapast ný tækifæri, samskipti og samstarf við ólíka einstaklinga. Öflugt frístunda- og félagsmiðstöðvastarf er því ómissandi hluti menntunar.
Brugðist er hratt við fjölbreyttum þörfum barna með viðeigandi úrræðum, með það að markmiði aðgreining verði sem minnst og að viðurkenndar aðferðir gæðakennslu styðji gott námsumhverfi. Farsæld barna er efld með samþættri þjónustu og öflugu samstarfi skóla-, félags- og heilbrigðisþjónustu og annarra fagaðila í samvinnu við barnafjölskyldur.
Áhersla er lögð á stafrænt læsi og að tækni sé nýtt á öruggan og markvissan hátt í námi og kennslu. Jafnframt er unnið með samþættingu námsgreina og heildstæða nálgun í námi sem styður framfarir barna og styrkir þau í að verða virkir þátttakendur í alþjóðlegu samfélagi.
Leikur, nám og kennsla byggjast á hæfnimiðaðri nálgun og leiðsagnarnám er í fyrirrúmi. Skýr áhersla er á framfarir og árangur hvers og eins. Skapandi hugsun, tækni og verklegum greinum er gert hátt undir höfði til að styrkja tengingu hugar og handar í skólastarfinu.
Grunnþættir menntunar eru leiðarljós í öllu skólastarfi. Þeir styðja börn í að bera ábyrgð á eigin heilbrigði og velferð, vera læs á umhverfi sitt, vera skapandi og sýna virðingu fyrir jafnrétti, lýðræði og mannréttindum. Börn fá tækifæri til að móta umhverfi sitt og skilja áhrif sín á sjálfbærni. Akureyrarbær er barnvænt sveitarfélag og áherslur Barnasáttmála og heimsmarkmiða Sameinuðu þjóðanna endurspeglast í leik, námi og starfi með það að markmiði að rækta persónuþætti, hæfni og trú á eigin getu.
Frá fyrstu skrefum í leikskóla Akureyrarbæjar til loka grunnskóla er grunnur lagður að þroska og námshæfni barna.
Stjórnun og fagleg forysta
Stjórnun skóla byggir á samvinnu, þátttöku, trausti og virðingu í samskiptum við alla aðila skólasamfélagsins. Unnið er í lýðræðislegu samstarfi við börn, fjölskyldur og starfsfólk. Starfsfólk hefur frumkvæði að samstarfi sem tekur mið af ólíkum þörfum, menningu og reynslu barna og fjölskyldna þeirra.
Skólastarf hjá Akureyrarbæ ber merki öflugs lærdómssamfélags undir forystu skólastjóra. Fagleg forysta styður markmiðs- og árangursmiðaða starfshætti og knýr áfram stöðugar umbætur.
Skipulag skóla styður samvinnu, sveigjanleika í skipulagi, teymiskennslu og samþættingu námsgreina, auk virkrar þátttöku barna þar sem hlustað er á sjónarmið þeirra og tekið mið af þeim.
Félags-, tómstunda- og frístundastarf er samofið skólastarfinu með samstarfi sérfræðinga á sviði kennslu, forvarnamála, frístunda og félagsmiðstöðva. Leiðtogar forvarna- og frístundamála starfa samkvæmt viðmiðum um öflugt frítímastarf með þátttöku barna og unglinga í forgrunni.
Reglubundið samstarf er á milli skólastiga og menntastofnana, sem og við stofnanir, fyrirtæki, listafólk, íþróttafélög og þá sem standa að menningarviðburðum. Þessar samfélagsstoðir mynda saman heild sem við köllum skólasamfélag.
Markmið menntunar er að skapa samfellt og heildstætt skóla- og frístundastarf í nánu samstarfi milli skólastiga, fjölskyldna og samfélagsins. Samstarf milli skólastiga er lykill að farsælum flutningi og þarf að vera skipulagt og markvisst, þannig að nám og reynsla nýtist frá leikskóla í grunnskóla og áfram í framhaldsskóla. Samvinna fagfólks skólastiga er þróuð með þetta markmið að leiðarljósi.